विरार, ता. १६ (बातमीदार) : वसई-विरार महापालिका क्षेत्रात अनधिकृत बांधकामांबरोबरच वाहतूक कोंडीची समस्याही मोठी आहे. वसई, नालासोपारा आणि विरार स्थानकाजवळ प्रवाशांना स्थानकातून बाहेर पडताना द्राविडी प्राणायाम करावा लागतो. यावर उपाय म्हणून वाहतूक पोलिसांनी विरार पूर्वेच्या जुने महापालिका कार्यालय व नालासोपारा येथील मजेठिया असे दोन ठिकाणचे रस्ते एक दिशा मार्ग केले आहेत. या एक दिशा मार्गिका धोरणामुळे या ठिकाणचे रस्ते मोकळे झाले असून, नागरिकांची वाहतूक कोंडीतून सुटका झाली आहे.

विरार वाहतूक शाखेने शहरातील अति गर्दी व वाहतूक कोंडी निर्माण होणाऱ्या ठिकाणांचे सर्वेक्षण केले होते. यात काही रस्त्यांच्या ठिकाणी एक दिशा मार्गिका तयार करणे गरजेचे असल्याने तसा आराखडा तयार केला आहे. पहिल्या टप्प्यात वर्तक चौक ते जुने विरार पोलिस ठाणे महापालिका कार्यालयासमोरून जाणारा रस्ता आणि मजेठिया नाका ते टोटाळे तलाव वाचनालयाकडे जाणाऱ्या रस्त्यावर ३१ ऑक्टोबरपासून एक दिशा मार्गिका तयार करण्याचा निर्णय घेण्यात आला आहे. पूर्वी दोन्ही मार्गांवर वाहनांची गर्दी आणि फेरीवाल्यांमुळे कोंडी होत होती, मात्र एक दिशा मार्गिका धोरण लागू केल्यानंतर त्या ठिकाणी वाहतूक पोलिस नियुक्त करून याबाबत जनजागृती करण्यात आली. तसेच महापालिकेच्या मदतीने त्या ठिकाणी बसणारे अनधिकृत फेरीवालेही हटविण्यात आले आहेत. त्यामुळे या रस्त्यावरून ये-जा करण्याचा मार्ग मोकळा झाल्याची माहिती वाहतूक विभागाने दिली आहे.