रिक्षाचालकांच्या अरेरावीने मनस्ताप
घणसोली रेल्वेस्थानकाबाहेर वाहतूक कोंडी
वाशी, ता. १७ (बातमीदार)ः घणसोली रेल्वेस्थानकासमोर रिक्षाचालकांच्या अरेरावीने प्रवाशांना मनस्ताप सोसावा लागत आहे. डी मार्ट मॉलसमोर बस थांब्यावरील प्रवाशांसाठी आडव्या-तिडव्या रिक्षा उभ्या केल्या जात असल्याने कोंडी उद्भवत आहे.
घणसोली रेल्वेस्थानकापासून घणसोली गाव, कोपरखैरणेकडे जाणाऱ्या तसेच रबाळे स्थानक ते घणसोली गावाकडे रिक्षाने जाणाऱ्या प्रवाशांची संख्या दररोज शेकडोंच्या घरात आहे. नवी मुंबई महापालिका तसेच वाहतूक विभागाने अधिकृत शेअरिंग रिक्षा थांबा उभारला आहे, मात्र भाडे मिळावे, या उद्देशाने रिक्षाचालकांकडून थेट स्थानकांच्या प्रवेशद्वारासमोर उभ्या केल्या जात आहेत. अशातच तीन प्रवासीसंख्येची मर्यादा असताना, एका रिक्षात तीनपेक्षा जास्त प्रवासी भरले जात आहेत. यासंदर्भात नवी मुंबई सहाय्यक उपप्रोदशिक परिवहन अधिकारी गजानन गावंडे यांच्याशी संपर्क झाला नाही.
-------------------------
वाहतुकीत विघ्न
घणसोली, रबाळे परिसरातील रिक्षाचालक रस्त्यावर रिक्षा उभ्या करत असल्यामुळे घणसोली रेल्वेस्थानक, मिडलँड हॉटेल घणसोली गावात सरपंच दगडू चाहू पाटील चौक, गावदेवी हॉटेल परिसर, रबाळे रेल्वेस्थानक जवळ पोलिस ठाणे पार्किंग झोन परिसर, रबाळे रेल्वे भुयारी मार्गाजवळ, डॉ. गवळी हॉस्पिटल, गोठीवलीतील विठ्ठल-रखुमाई मंदिर येथे कोंडीमुळे अडथळा निर्माण होतो.