वर्ल्ड मेमरी चॅम्पियनशिपमध्ये भारताचा दबदबा कायम
प्रभादेवी, ता. १७ : नवी मुंबई येथे नुकत्याच पार पडलेल्या वर्ल्ड मेमरी चॅम्पियनशिप आंतरराष्ट्रीय स्पर्धेत भारताच्या खेळाडूंनी आपला दबदबा कायम ठेवला आहे. पुद्दुचेरीचा विश्वा राजकुमार (वय २०) याने ‘आवर कार्ड्स’ या कठीण प्रकारात एकाच तासात तब्बल २२ डेक्सच्या पत्त्यांची यशस्वी खेळी करून नवीन राष्ट्रीय विक्रम प्रस्थापित केला. या स्पर्धेत विश्वा राजकुमार याने ५,५८२ चॅम्पियनशिप गुणांसह एकूण विजेतेपदावर आपले नाव कोरले. त्याला एक लाख रुपयांचे पारितोषिक प्रदान करण्यात आले.
ब्रेन इन्फिनिट यांनी आयोजित मेमरी स्पोर्ट्स फेडरेशन ऑफ इंडियाच्या मार्गदर्शनाखाली पार पडलेल्या या तीनदिवसीय स्पर्धेत भारत, ऑस्ट्रिया, जर्मनी, फिलिपाइन्स, इटली, फ्रान्स आणि उझबेकिस्तान या सात देशांतील २२३ स्पर्धकांनी १० वेगवेगळ्या मेमरी डिसिप्लिन्समध्ये सहभाग घेतला होता. रिलायन्स लाइफ सायन्सचे अध्यक्ष के. व्ही. सुब्रमण्यम यांच्या हस्ते विजेत्यांना पारितोषिके प्रदान करण्यात आली.