भारत विकास परिषदेतर्फे कृतज्ञता सोहळा
सकाळ वृत्तसेवा
डोंबिवली, ता. १९ ः हुतात्मा कॅप्टन विनयकुमार सच्चान शाखेचा कृतज्ञता सोहळा व स्नेहमिलन शास्त्री हॉलमध्ये पार पडले. या सोहळ्यासाठी मुंबई कोकण प्रांताचे संघटन सचिव रविप्रकाश, प्रमुख वक्ते आणि शाखेचे प्रांत पालक अरुण सावंत मार्गदर्शक म्हणून हजेरी लावली होती. याप्रसंगी पद्मश्री गजानन माने, कॅडेट्स कमांडर सुनील कांबळे आणि राष्ट्रपती सेवापदक प्राप्त मनोज नेर्लेकर आणि भाविपच्या मुलुंड शाखेचे सदस्य आशिष गोयल उपस्थित होते. सैनिकांसाठी १० सीमांवर १० हजार दिवाळी फराळ भेट पाठविण्यासाठी विविध प्रकारची सेवापुरवठा करणाऱ्या संस्थांप्रती सोहळ्यात कृतज्ञता व्यक्त करण्यात आली. उपस्थित मान्यवर, सर्व गट प्रतिनिधी आणि सेवा पुरवठादारांना तुळशी रोपासोबतच सन्मानपत्र देऊन यथोचित सत्कार करण्यात आला. कार्यक्रमाचे सूत्रबद्ध संचालन शाखा सदस्य विश्राम परांजपे आणि ॲड. शिल्पा भागवत यांनी केले. कार्यक्रमाचे ऋणनिर्देश शाखेचे सचिव सीए संदीप केळकर यांनी केले.