सीवूडकरांना वाहनपार्किंगचा भुर्दंड
कंत्राटदाराकडून दर पत्रकातील बदलाने नाराजी
जुईनगर, ता.१९ (बातमीदार): नेरुळ सेक्टर ३५, ४० व ४२ परिसरात अनंत गुरुजी चौक, तांडेल मैदान रस्त्यालगत पार्किंगसाठी शुल्कदरांमध्ये कंत्राटदाराने वाढ केली आहे. पण हा प्रकार नियमबाह्य असल्याचा आरोप स्थानिक नागरिकांनी केला आहे.
महापालिका मालमत्ता विभागातर्फे पार्किंग शुल्क आकारण्याचे कंत्राट देण्यात आले आहे. मात्र, कंत्राटदाराकडून पालिकेने नेमून दिलेल्या दरांपेक्षा अधिक दर आकारले जात आहे. महापालिकेने सायकल, दुचाकी, तीनचाकी आणि चार चाकी वाहनांसाठी दर रुपये २, १० आणि २० आकारण्याचे आदेश दिले आहेत. मात्र, या ठिकाणी दुचाकी आणि चारचाकी दोन्ही वाहनांसाठी २० रुपये आकारण्यात येते आहेत. त्यामुळे पालिकेने दुचाकीसाठी १० रुपये ठरवून दिले असताना कंत्राटदार २० रुपये आकारत आहे. शिवाय आकारण्यात येणार दर ४ तास, १० तास कालावधीसाठी असल्याने पाच ते दहा मिनिटांसाठी जरी वाहन पार्क केले तरी २० रुपये द्यावे लागत असल्याने आर्थिक भुर्दंड सोसावा लागत आहे.
----------------------
आंदोलनाचा इशारा
पालिकेने ठरवून दिलेले दर आणि आकारण्यात येत असलेले दर यामध्ये तफावत आहे. याबाबत मालमत्ता उप आयुक्तांना निवेदन दिले आहे. तरी देखील ही वसुली थांबली नाही, त्यामुळे जन आंदोलन करणार असल्याचे ठाकरे गटाचे उपशहर प्रमुख समीर बागवान यांनी सांगितले.