लाडक्या बहिणींना दिलासा
ई-केवायसीसाठी ३१ डिसेंबरपर्यंतची मुदतवाढ
नवीन पनवेल, ता. २२ (बातमीदार) ः राज्य शासनाने मुख्यमंत्री माझी लाडकी बहीण योजनेसाठी लाभार्थींना १८ नोव्हेंबरपर्यंत ई-केवायसी करणे अनिवार्य केले होते; मात्र बहुतांश महिलांनी ही प्रक्रिया केली नसल्याने आता ३१ डिसेंबर २०२५ पर्यंत मुदतवाढ देण्यात आली आहे.
नैसर्गिक आपत्तीमध्ये पती किंवा वडिलांचे निधन झाल्यामुळे काही महिलांना संबंधित आधार क्रमांकावर ओटीपी प्राप्त होणे अशक्य होत होते. त्यामुळे सातत्याने ई-केवायसी प्रक्रियेस मुदतवाढ देण्याची मागणी होत होती. या अनुषंगाने पात्र महिलांना न्याय मिळावा, याकरिता ३१ डिसेंबरपर्यंत मुदतवाढ देण्यात आली आहे. ज्या पात्र महिलांचे पती किंवा वडील हयात नाहीत किंवा ज्या महिला घटस्फोटित आहेत, अशा महिलांना स्वतःची ई-केवायसी प्रक्रिया पूर्ण करून संबंधितांचे मृत्यू प्रमाणपत्र, घटस्फोट प्रमाणपत्र किंवा न्यायालयाचा आदेश यांची सत्यप्रत सादर करण्याची विशेष सुविधा उपलब्ध करून देण्यात आली आहे. त्यामुळे पनवेल तालुक्यातील लाडक्या बहिणींना मुदतवाढीचा फायदा होणार आहे.