जुहूमध्ये बालदिन उत्साहात साजरा
घाटकोपर, ता. २० (बातमीदार) ः जुहू येथे बालदिन मोठ्या उत्साहात आणि आनंदमय वातावरणात साजरा करण्यात आला. स्वर्ण चॅरिटेबल ट्रस्ट यांच्या वतीने शिवशंकर गणेश मंदिर परिसरात विशेष बालदिन कार्यक्रमाचे आयोजन करण्यात आले होते.
कार्यक्रमादरम्यान लहान मुलांना गुलाबाची फुले, बिस्किटे, नाश्ता आणि सरबत वाटून त्यांचा सत्कार करण्यात आला. मुलांच्या चेहऱ्यावर आनंदाची लहर उमटली आणि वातावरण उत्साहाने भारले. संस्थेचे अध्यक्ष रमेश परशुराम पाटील, तसेच सना आरिफ शेख आणि साक्षी महेश पाटील यांच्यासह स्वयंसेवकांनी मुलांशी संवाद साधत बालदिनाचे महत्त्व समजावून सांगितले. मुलांच्या सर्वांगीण विकासासाठी शिक्षण, संस्कार आणि सकारात्मक दृष्टिकोन किती महत्त्वाचा आहे, यावरही मार्गदर्शन करण्यात आले. राम स्वर्ण चॅरिटेबल ट्रस्टतर्फे दरवर्षी बालदिनानिमित्त विविध सामाजिक उपक्रमांचे आयोजन केले जाते.