मालवणीत कचरा उचलण्याकडे दुर्लक्ष
मालाड, ता. २० (बातमीदार) ः मालाड पश्चिमेतील मालवणी क्रमांक ७ येथील शौचालयालगत तब्बल पाच ते सहा फूट उंचीचे कचऱ्याचे मोठे डोंगर उभे राहिल्याने परिसरातील नागरिकांचे हाल सुरू आहेत. प्लॉट क्रमांक ४, नवीन कलेक्टर कंपाउंड येथील शौचालय बांधकामानंतर कंत्राटदाराने डेब्रिज न उचलल्याने या ठिकाणी प्रथम बांधकामाचा मलबा साचला आणि त्यानंतर नागरिकांनी टाकाऊ वस्तू व इतर कचरा टाकण्यास सुरुवात केली. परिणामी आज येथे प्रचंड कचरा साचून गंभीर आरोग्याचा धोका निर्माण झाला आहे.
कचऱ्याच्या ढिगाऱ्यामुळे शौचालयात ये-जा करताना नागरिकांना वाट शोधावी लागत आहे. दुर्गंधी, घाण आणि डासांचे वाढते प्रमाण यामुळे परिसरातील रहिवाशांना जगणे कठीण झाले आहे.
स्थानिक रहिवासी तारीख शेख यांनी पालिकेच्या हेल्पलाइनवर अनेक वेळा तक्रारी नोंदवल्या आहेत. परंतु त्यांच्या मते, पालिकेकडून फक्त नाममात्र कचरा उचलण्याचा देखावा केला जात असून, कचऱ्याचा डोंगर मात्र दिवसेंदिवस वाढतच चालला आहे.