उल्हासनगर, ता. २० (बातमीदार) : महाराष्ट्र सुवर्ण जयंती नगरोत्थान महाअभियान योजनेंतर्गत उल्हासनगर महापालिका क्षेत्रातील प्रभाग क्रमांक १८ मध्ये सीसी (सिमेंट काँक्रीट) पायवाटा आणि नाल्यांच्या बांधकामाला लवकरच सुरुवात होणार आहे. सार्वजनिक बांधकाम विभागाच्या पुढाकारामुळे प्रभाग १८ ला २०२६ च्या नव्या वर्षात सुसज्ज पायाभूत सुविधांचा नवा लाभ मिळणार आहे.
प्रभाग क्रमांक १८ हा आंबेडकरी चळवळीचा बालेकिल्ला म्हणून ओळखला जातो. येथील नागरिक विविध आर्थिक स्तरांतील असूनही परस्पर सलोख्याने राहत आहेत. मात्र, या परिसरातील पायवाटा आणि नाल्यांची स्थिती काही काळापासून अत्यंत दयनीय झाली होती. नागरिकांनी वारंवार केलेल्या मागण्यांच्या अनुषंगाने आयुक्त मनीषा आव्हाळे आणि अतिरिक्त आयुक्त डॉ. धीरज चव्हाण यांच्या मार्गदर्शनाखाली या कामांना प्रशासनाने गती दिली आहे.
सार्वजनिक बांधकाम विभागाचे शहर अभियंता नीलेश शिरसाठे आणि उपअभियंता संदीप जाधव यांच्या देखरेखीखाली कामे करण्यात येणार आहेत. या कामांसाठी आवश्यक निविदा प्रक्रिया पूर्ण झाली असून, निविदा मिळालेल्या ठेकेदारांनी १८० दिवसांत संबंधित कामे पूर्ण करायची आहेत.

कोणत्या भागांत होणार कामे?
प्रभाग १८ मधील विविध वसाहती आणि रस्त्यांवर सीसी पायवाटा व नाल्यांची बांधकामे करण्यात येणार आहेत. बुद्ध कॉलनी, अचानक नगर, नागसेन नगर, कुर्ला कॅम्प ते मार्या किराणा परिसर, अकुंश जानराव यांच्या घरापासून गंगाधर मोहड यांच्या घरापर्यंत, दलित पँथर चौकापासून राजपूत यांच्या घरापर्यंत, वाकचौरे हाऊस ते रवी दिवटे हाऊस, पप्पू यांच्या घरापासून ते शिरीष पगारे यांच्या घरापर्यंत, निरभवणे यांच्या घरापासून मगर यांच्या घरापर्यंत आणि कांबळे यांच्या घरापासून नागेश शेजव यांच्या घरापर्यंत. या सर्व ठिकाणी सिमेंट काँक्रीटच्या मजबूत पायवाटा आणि नाल्या निर्माण झाल्यानंतर प्रभागाच्या पायाभूत सुविधांत लक्षणीय सुधारणा होणार आहे. यामुळे नागरिकांची अडचण दूर होण्याची शक्यता आहे.