माजी नगरसेवकांशी विशेष बैठक
सकाळ वृत्तसेवा
डोंबिवली, ता. २१ : डोंबिवलीतील राजकीय वातावरण तापले असताना मनसेमध्ये मोठी हालचाल पाहायला मिळत आहे. भाजपकडून मनसेच्या माजी नगरसेवकांना गळ घालण्याचे प्रयत्न सुरू असल्याची चर्चा रंगात असतानाच मनसे अध्यक्ष राज ठाकरे यांनी पुढाकार घेत डॅमेज कंट्रोल केल्याचे म्हटले जात आहे. भाजप प्रदेश नेतृत्वाने मनसेतील काही माजी नगरसेवकांना संपर्क साधल्याचे बोलले जात आहे. माजी नगरसेवक प्रकाश भोईर, सरोज भोईर, मंदा पाटील, कस्तुरी देसाई हे भाजपा मध्ये प्रवेश करू शकतात, अशी जोरदार चर्चा राजकीय वर्तुळात होती.

या पार्श्वभूमीवर मनसे अध्यक्ष राज ठाकरे यांची मनसे नेते राजू पाटील आणि केडीएमसीमधील माजी नगरसेवकांसोबत गुरुवारी खास भेट झाल्याने खळबळ उडाली आहे. या बैठकीला मनोज घरत, प्रकाश भोईर, कस्तुरी देसाई, कोमल पाटील उपस्थित होते. या बैठकीत संबंधित माजी नगरसेवकांनी आपली भूमिका स्पष्ट केली, तसेच आगामी निवडणूक कशा पद्धतीने लढवायची, स्थानिक संघटनात्मक समीकरणे आणि उमेदवारी यावर सविस्तर चर्चा झाली असल्याचे सूत्रांनी सांगितले.