पोर्ट ट्रस्ट कामगार विशेषांकाचे प्रकाशन
शिवडी, ता. २० (बातमीदार) ः मुंबई पोर्ट ट्रस्ट डॉक अँड जनरल एम्प्लॉईज युनियनच्या वतीने २९व्या पोर्ट ट्रस्ट कामगार विशेषांकाचे प्रकाशन बुधवारी (ता. १९) बॅलार्ड पिअर येथील पोर्ट ट्रस्टच्या विजयदीप कॉन्फरन्स हॉलमध्ये ज्येष्ठ कामगार नेते ॲड. एस. के. शेट्ये यांच्या अध्यक्षतेखाली व प्रमुख पाहुणे कवी अशोक नायगावकर यांच्या हस्ते करण्यात आले. नायगावकर यांनी पोर्ट ट्रस्ट कामगार विशेषांकाला शुभेच्छा दिल्या.
डॉ. शांती पटेल, कॉ. एस. आर. कुलकर्णी, जॉर्ज फर्नांडिस या कामगार नेत्यांनी आयुष्यभर आपले योगदान देऊन कामगारांचे हित साध्य केले, त्यासाठी कामगारांनी संघर्षदेखील केला. कामगार चळवळ दिवसेंदिवस कमकुवत होत चालली आहे, ही वस्तुस्थिती असून आजकाल वृत्तपत्र क्षेत्रात कामगार सदरेदेखील बंद झालेली आहे. मुंबईचा कणा असलेला कामगार आता मुंबईतून हद्दपार झाला आहे, अशी खंत नायगावकर यांनी या वेळी व्यक्त केली.