फसवणूक प्रकरणी डॉक्टर दाम्पत्याचा जामीन फेटाळला
फार्मसीच्या नावाखाली ७० लाख रुपयांची फसवणूक
कल्याण, ता. २० (वार्ताहर) : कल्याण जिल्हा आणि अतिरिक्त सत्र न्यायाधीश परवीन सय्यद यांनी फसवणूक प्रकरणात डॉ. प्रसाद साळी आणि पत्नी वैशाली साळी यांचा अटकपूर्व जामीन फेटाळला आहे. डॉ. प्रसाद साळी आणि त्यांच्या पत्नी वैशाली साळी यांच्यावर ७० लाखांची फसवणूक केल्याचा आरोप आहे.
कल्याणच्या खडकपाडा पोलिस ठाण्यात प्रज्ञा कांबळे आणि डॉ. राहुल दुबे यांनी साळी पती-पत्नीविरोधात १३ सप्टेंबर रोजी फार्मसीच्या नावाखाली ७० लाखांची फसवणूक केल्याचा गुन्हा दाखल झाला. तपासादरम्यान गणेश पाटील आणि धनश्री गोडांबे या आणखी दोन व्यक्तींचीही फसवणूक झाल्याचे उघड झाले होते. याप्रकरणी साळी पती-पत्नीने अटकपूर्व जामीनासाठी अर्ज केला होता. यावर न्यायाधीश परवीन सय्यद यांनी दोन्ही बाजूंचा युक्तीवाद ऐकून साळी पती-पत्नीचा जामीन फेटाळला आहे.