कांदिवली बस थांब्यांवर प्रवाशांचे हाल
कांदिवली, ता. २२ (वार्ताहर) : कांदिवली पश्चिमेकडील बस थांब्यांवर प्रचंड गर्दी आणि अपुऱ्या सुविधांमुळे प्रवाशांचे मोठे हाल होत आहेत. स्टेशनजवळच्या बस थांब्यावर बसेस प्रवाशांनी तुडुंब भरून येत असल्याने, पुढील थांब्यांवरील प्रवाशांना दाटीवाटीने आणि उभे राहून प्रवास करावा लागत आहे.
स्टेशनहून सुटणाऱ्या बसेसच्या थांब्यावर प्रवाशांसाठी बसण्याची सोय नाही. पहिल्या देना बँक या बस थांब्यावर बसण्याची व्यवस्था नाही, फक्त लोखंडी खांब आणि पाटी आहे. तरण तलाव थांब्यावर कचराकुंडीच्या दुर्गंधीचा त्रास सहन करावा लागत आहे. कांदिवली गावठाण थांब्यावर आसने तुटल्याने तात्पुरता बाकडा ठेवला आहे. तर डहाणूकर वाडी-चारकोप मार्गावर विकास कामांमुळे अनेक ठिकाणी बस थांबे कमी झाले आहेत. प्रवाशांनी ताटकळत उभे राहून बस पकडावी लागत आहे, त्यातच स्टेशनहून येणाऱ्या बसमध्ये प्रचंड गर्दी असल्याने गैरसोय वाढली आहे. बेस्ट प्रशासनाने प्रवाशांची संख्या लक्षात घेऊन बस थांब्यांवर तातडीने आसन व्यवस्था उपलब्ध करावी, अशी मागणी प्रवाशांकडून जोर धरू लागली आहे.