राज्यभरात आज टीईटीची परीक्षा
मुंबई, ता. २२ ः राज्य परीक्षा परिषदेकडून घेण्यात येणाऱ्या शिक्षक पात्रता परीक्षा (टीईटी) रविवारी (ता. २३) होत आहे. ही परीक्षा सकाळी १०.३० ते १ आणि दुपारी २.३० ते ५ या वेळात दोन सत्रांत होणार आहे. या परीक्षेला यंदा चार लाख ७५ हजार ६६८ उमेदवारांनी परीक्षेसाठी आपले नाव नोंदवले आहे. राज्यभरात टीईटीची ही परीक्षा यंदा एकूण १,४२० केंद्रांवर होणार आहे. यात मुंबईतील १८ परीक्षा केंद्रांचा समावेश आहे. या परीक्षेला उमेदवारांनी परीक्षा सुरू होण्यापूर्वी एक तास अगोदर उपस्थित राहणे बंधनकारक असल्याचे विभागाकडून स्पष्ट करण्यात आले आहे. मुंबईच्या टीईटीसाठी तीन विभागांतून मिळून १२,५८१ उमेदवारांनी नोंदणी केली आहे. यात मुंबई दक्षिण ३,५०७, मुंबई पश्चिम ४,९८१ आणि मुंबई उत्तर ४,१६२ उमेदवारांचा समावेश आहे. ठाण्यातूनही १६,९१४ इतक्या उमेदवारांचा समावेश असल्याची माहिती शिक्षण विभागाकडून देण्यात आली. ही परीक्षा दोन पेपरसाठी होईल. यात पेपर-१ साठी २,०३,३३३, तर पेपर-२साठी २,७२,३३५ उमेदवार परीक्षेला बसतील. तर पेपर-२ मधील समाजशास्त्र विषयाला सर्वाधिक १,७०,५४१, तर गणित विषयाला १,०१,७९४ उमेदवार परीक्षेला बसणार आहेत.