मतदारांपर्यंत पोहोचण्याची धडपड
आजी, माजीसह इच्छुकांचा उत्साह शिगेला
तुर्भे, ता.२२ (बातमीदार): नवी मुंबई महापालिकेचे प्रभाग आरक्षण सोडत नुकतीच पार पडली. आजी, माजी नगरसेवकांबरोबर इच्छुक नगरसेवक देखील निवडणुकीच्या रिंगणात उतरणार आहेत. प्रभागातील मतदारांपर्यंत पोहोचण्यासाठी आरोग्य शिबिराचा धडाका सुरु झाला आहे.
नवी मुंबई महापालिकेची २०१५ मध्ये निवडणूक झाली होती. त्यानंतर दहा वर्षांनी २०२५ मध्ये पालिकेची निवडणूक लागली आहे. निवडणुकीची तारीख जाहीर होणे बाकी आहे. मात्र, निवडणूक आयोगाची तयारी बघता कोणत्याही क्षणी तारीख जाहीर होण्याची शक्यता आहे. यामुळे प्रभागातील माजी नगरसेवक, इच्छुक उमेदवार कामाला लागले आहेत. प्रभागातील आजी माजी तसेच इच्छुक उमेदवार समाजमाध्यमांवर चमकू लागले आहेत. हक्काचा माणूस, जनतेचा माणूस, आपलाच नगरसेवक, भावी लोकप्रतिनिधी अशा आशयाचे बॅनर झळकु लागले आहेत.
------------------------------
विविध कार्यक्रमांचे धडाका
नुकतेच बालदिनाचा कार्यक्रम घेण्यात आला. या कार्यक्रमासाठी आजी-आजोबांना विशेष आमंत्रण होते. काही नगरसेवकांकडून वाढदिवसाच्यानिमित्त मतदारांना मेजवानी दिली. तर माजी नगरसेवकांनी जनसंपर्क वाढवण्यासाठी क्रिकेटचे सामने भरवले आहेत. तर महिला उमेदवारांनी कौशल्य विकास प्रशिक्षण शिबिर घेतले. तर काहींनी वाहनचालक प्रशिक्षण, विशेष घरगुती व्यवसाय करण्यासाठीचे प्रशिक्षण देण्यात आले.