अखेर कर्मचाऱ्यांचे ‘आपला दवाखाना’मधील थकीत वेतन जमा
सकाळ वृत्तसेवा
ठाणे, ता. २३ : ठाणे महापालिकेने ४० ठिकाणी सुरू केलेल्या ‘आपला दवाखाना’ उपक्रमातील कंत्राटी कर्मचारी आणि परिचारिकांचा तीन महिन्यांपासून थकीत असलेला पगार अखेर त्यांच्या खात्यावर जमा झाला आहे. आमदार संजय केळकर यांनी केलेली आक्रमक मागणी आणि पाठपुराव्यामुळे हे यश मिळाले आहे.
कंत्राटदार कंपनीने ऑक्टोबरपर्यंत मुदत असताना ऑगस्टमध्येच दवाखाने बंद केल्याने कर्मचारी बेरोजगार झाले होते आणि त्यांचा पगारही रखडला होता. कर्मचाऱ्यांनी आमदार केळकर यांची भेट घेऊन आपली व्यथा मांडली होती. केळकर यांनी पालिका प्रशासनाला धारेवर धरत संबंधित कंपनीला दंड लावून कर्मचाऱ्यांचे वेतन त्वरित अदा करण्याची मागणी केली होती. तसेच कारवाई न झाल्यास मोर्चा काढण्याचा इशारा दिला होता. केळकर यांच्या आक्रमक भूमिकेनंतर प्रशासनाने तातडीने कार्यवाही केली. अखेर रखडलेले तीन महिन्यांचे वेतन कर्मचाऱ्यांच्या खात्यात जमा झाल्याने त्यांच्यात आनंदाचे वातावरण आहे. त्यांनी केळकर यांचे आभार मानले आहेत.