शहाड उड्डाणपुलावरून रंगला वाद
भाजप, शिवसेना आणि टीओकेमध्ये श्रेयावरून कुरघोडी

उल्हासनगर, ता. २३ (वार्ताहर) : उल्हासनगर-कल्याण परिसरात वाहतूक कोंडी कमी करण्यासाठी अत्यंत महत्त्वाचा मानला जाणारा शहाड उड्डाणपूल पूर्ण झाला आहे. या पुलाच्या उद्घाटनावरून राजकीय पक्षांमध्ये श्रेयवाद रंगला आहे. तर रविवारी या पुलाचे दोन वेळा उद्घाटन झाल्याने नागरिकांच्या सोयीपेक्षा भाजप आणि शिवसेना, टीओके यांच्यातील राजकीय कुरघोडीच्या राजकारणाची चर्चा रंगली आहे.
शहाड उड्डाणपुलाचा उद्घाटन सोहळा सोमवारी (ता. २४) सकाळी आयोजित करण्यात आला आहे. मात्र भाजपने अचानक रविवारी (ता. २३)
दुपारी शहाड उड्डाणपुलाचे फीत कापून उद्घाटन केले. त्यानंतर काही तासांतच शिवसेना आणि टीओके गटानेही आपला स्वतंत्र उद्घाटन सोहळा केला. एकाच पुलाचे दोनदा उद्घाटन झाल्याने शहरात हा चर्चेचा विषय ठरला आहे.
---
पक्षांमध्येच स्पर्धा
या पुलाच्या बांधकामात असंख्य अडथळे आल्याने अनेक वेळा कामाला विलंब झाला. मात्र काम पूर्ण झाल्यानंतर नागरिकांना सुविधा देण्यापेक्षा राजकीय श्रेय मिळवण्यासाठी राजकीय पक्षांमध्येच स्पर्धा लागलेली दिसते.
---
आज तिसरे उद्घाटन
या सगळ्या गोंधळानंतरही अजून एक उद्घाटन सोमवारी (ता. २४) सकाळी होणार आहे. सकाळी नियोजित कार्यक्रमानुसार पुलाचे अधिकृत उद्घाटन आमदार कुमार आयलानी यांच्या हस्ते होणार असल्याचे त्यांच्या कार्यालयातून सांगण्यात आले.
-----
भाजपची घाई
आम्ही उद्घाटन करणार असल्याचे कळताच भाजपने घाईघाईत पुलाचे उद्घाटन केले. जनतेची दिशाभूल करण्याचा हा प्रकार आहे. श्रेय मिळवण्यासाठी भाजप कोणत्या पातळीवर जाईल हे यावरून दिसते, अशी टीका शिवसेना शिंदे गटाचे नेते राजेंद्र चौधरी यांनी केली.