डम्पिंग ग्राउंड तत्काळ बंद करा अन्यथा शिवसेना स्टाइल आंदोलन
तलासरी, ता. २४ (बातमीदार) : तलासरी तालुक्यातील इभाडपाडा येथील डम्पिंग ग्राउंडमुळे आरोग्यास निर्माण झालेल्या गंभीर धोक्याच्या पार्श्वभूमीवर शिवसेना तलासरी तालुक्याच्या वतीने डहाणू विधानसभा क्षेत्र प्रमुख सुनील लहान्या इभाड यांनी नगर परिषद प्रशासनाला इशारा दिला आहे. त्यांनी ११ नोव्हेंबरला तलासरी पोलिस ठाणे व तलासरी नगर परिषद यांना दिलेल्या निवेदनात ‘डम्पिंग ग्राउंड तत्काळ बंद करा अन्यथा शिवसेना स्टाइल आंदोलन अपरिहार्य’ असे स्पष्ट केले आहे.
डम्पिंग ग्राउंडमुळे परिसरात तीव्र दुर्गंधी, डास-माश्यांचा उपद्रव आणि कचरा जाळण्यामुळे होणाऱ्या धुरामुळे नागरिकांचे आरोग्य धोक्यात आले आहे. प्रशासनाच्या निष्काळजी कारभारामुळे तसेच घनकचरा व्यवस्थापन नियम २०१६चे उल्लंघन करीत कचरा मनमानी पद्धतीने टाकणे व जाळणे सुरू असल्याने तलासरी व आसपासच्या नागरिकांना त्रास होत असल्याचा आरोप सुनील इभाड यांनी केला आहे.
------------------
डम्पिंग ग्राउंड बंद करून पर्यायी जागा त्वरित दाखवा अन्यथा आम्ही शिवसेना स्टाइलने तळ ठोकून आंदोलन करू आणि त्याची सर्व जबाबदारी नगर परिषद प्रशासनाची असेल.
- सुनील इभाड, तलासरी तालुका अध्यक्ष, शिवसेना
------------------
तलासरीत दररोज पाच टन कचरा जमा होतो. पुढील दोन-तीन दिवसांत संपूर्ण कचरा साफ करण्यात येणार आहे. नवीन ठिकाणासाठी मागील काही वर्षांपासून पाठपुरावा सुरू आहे.
- संतोष वावरे, स्वच्छता निरीक्षक, तलासरी नगर पंचायत

(खाली कोट साठी फोटो दिला आहे - सुनील इभाड)