भिवंडी, ता. २४ (बातमीदार) : भिवंडीतील कल्याण रोड परिसरात तीन भटक्या कुत्र्यांचा संशयास्पदरित्या मृत्यू झाला असून, एक गंभीर अवस्थेत आढळला आहे. याप्रकरणी प्राण्यांवर क्रूरता प्रतिबंधक कायदा आणि भारतीय दंड संहितेच्या कलमांखाली सोसायटीच्या दोन अध्यक्षांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना २० नोव्हेंबरच्या रात्री साईबाबा मंदिराजवळील ऑनरेट राईस कॅलिस्टो सोसायटीमध्ये घडली. तक्रारदार आणि सामाजिक कार्यकर्त्या अनुपमा जयंतीलाल जैन यांनी सांगितले की, सोसायटीच्या आवारात राहणारे तीन भटके कुत्रे मृतावस्थेत तर एक गंभीर अवस्थेत आढळला. अनुपमा जैन यांनी तक्रारीत सोसायटीच्या दोन अध्यक्षांवर कुत्र्यांना विष देऊन मारल्याचा आरोप केला आहे. ते वारंवार या भटक्या कुत्र्यांवर आक्षेप घेत होते. तसेच, विषारी पदार्थ देऊन त्यांना इजा करण्याचा प्रयत्न करत होते. या तक्रारीच्या आधारे शांतीनगर पोलिसांनी दोन्ही आरोपींविरुद्ध गुन्हा दाखल केला आहे.

कठोर कारवाई होणार
भटक्या कुत्र्यांचा संशयास्पदरित्या मृत्यू प्रकरणाची चौकशी सुरू आहे. सोसायटीच्या दोन अध्यक्षांवर गुन्हा दाखल केला आहे. तिन्ही कुत्र्यांचे मृतदेह सध्या शवविच्छेदनासाठी पाठवण्यात येत आहेत, तर जखमीवर उपचार सुरू आहेत. घटनेचे गांभीर्य लक्षात घेता सर्व पैलूंचा तपास केला जात असून जबाबदार असलेल्यांवर कठोर कारवाई केली जाईल, अशी माहिती पोलिस उपनिरीक्षक गोरे यांनी दिली आहे.