बोर्डी गाव परिसरात बिबट्याचे दर्शन

बोर्डी, ता. २५ (बातमीदार) ः बोर्डी ग्रामपंचायत क्षेत्रातील मरवाड भागामध्ये बिबट्याचे दर्शन घडले आहे. त्यामुळे सावधानता बाळगावी, असे आवाहन प्राणिमित्र सूर्यहास चौधरी व वन अधिकारी राजेश सारणीकर यांनी नागरिकांना केले आहे.
सोमवारी (ता. २४) सायंकाळी मरवाड परिसरात काही नागरिकांना बिबट्याचे दर्शन झाले. या घटनेची माहिती तेथील नागरिकांनी वन अधिकाऱ्यांना, तसेच प्राणिमित्र सूर्यहास चौधरी यांना कळविताच घटनास्थळी वनखात्याची टीम रवाना झाली. परिसरात शोध घेतल्यानंतर बिबट्या आढळला नाही; परंतु पुन्हा बिबट्याचे दर्शन झाल्यास नागरिकांनी काळजी घ्यावी. लहान मुलांनी शक्यतो एकटे बाहेर पडू नये. मोठ्या माणसांनीदेखील सावधानता बाळगावी, असे आव्हान वन अधिकारी राजेश सारणीकर यांनी केले आहे. भरगच्च वस्तीमध्ये बिबट्याची दहशत वाढत असल्यामुळे चिंतेचे वातावरण पसरले आहे.