शहापूर (वार्ताहर) : वासिंदजवळील भातसई गावातील असलेल्या संत गाडगेबाबा मिशनच्या आश्रमशाळेच्या शिक्षिका सारिका गायकवाड यांनी आपल्या विविध मागण्यांसाठी तहसीलदार कार्यालयाबाहेर मंगळवारी (ता. २५) उपोषण सुरू केले आहे. भातसईचे सरपंच नामदेव कापटे व काही गावकरी यांनी आश्रमशाळेच्या जमिनीवर अतिक्रमण केले आहे. ते हटवण्यासाठी प्रयत्न करीत असल्याने नानाविध प्रकारांनी धमकावले जात आहे. तसेच येथून माझी अन्यत्र बदली करावी, म्हणून माझ्याविरुद्ध ग्रामसभा बोलावून ठराव घेण्यात आला. या सभेत घेण्यात आलेल्या सह्या संशयास्पद आहेत. यामुळे संबंधितांवर कारवाई करण्याच्या मागणीसाठी उपोषण सुरू केले आहे, असे मुख्याध्यापिका गायकवाड यांनी सांगितले.