शिवसेना-काँग्रेस उमेदवारांमध्ये हाणामारी
अंबरनाथमध्ये राजकीय वातावरण तापले
बदलापूर, ता. २७ (बातमीदार) : अंबरनाथ नगरपरिषद निवडणुकीच्या पार्श्वभूमीवर शहरातील राजकीय वातावरण चांगलेच तापले असून, न्यू कॉलनी परिसरात शिवसेना (शिंदे गट) आणि काँग्रेसच्या उमेदवारांमध्ये थेट हाणामारी झाल्याची घटना घडली आहे.

शिवसेना (शिंदे गट) उमेदवार आणि माजी नगरसेवक सुनील सोनी आणि काँग्रेसचे माजी नगरसेवक उमेदवार मिलिंद पाटील या दोघांची निवडणूक प्रचार कार्यालये एकमेकांच्या शेजारी होती. काँग्रेस उमेदवाराच्या कार्यालयाच्या परवानगीवरून वाद सुरू झाला, ज्याचे रूपांतर हाणामारीत झाले. पालिकेचे कर्मचारी पाटील यांच्या अवैध मंडपावर कारवाई करण्यासाठी आले असता वादाला तोंड फुटले, असे सांगण्यात येत आहे.हाणामारीच्या घटनेत शिवसेना उमेदवार सुनील सोनी जखमी झाले आहेत. याप्रकरणी अंबरनाथ पोलिसांनी दोन्ही उमेदवारांविरोधात अदखलपात्र गुन्हा दाखल केला आहे. तसेच दोघांच्याही प्रचार कार्यालयांची परवानगी रद्द करण्यात आली आहे.

उमेदवारांचे आरोप-प्रत्यारोप
सुनील सोनी (शिंदे गट) यांनी "मी दूर उभा असताना माझ्यावर पेव्हर ब्लॉक फेकण्यात आला," असा आरोप त्यांनी केला आहे. तर काँग्रेसचे मिलिंद पाटील यांनी मी फक्त स्वतःचा बचाव करत होतो, असे प्रतिपादन त्यांनी केले. या हाणामारीच्या प्रकरणामुळे स्थानिक निवडणुकीतील तणाव अधिक वाढला असून मतदारांमध्येही या घटनेची मोठी चर्चा रंगली आहे. निवडणुकीचा उर्वरित कालावधी शांततेत पार पडावा, यासाठी पोलिसांनी अधिक दक्षता घेण्याची गरज निर्माण झाली आहे.