आमदार निकोलेंकडून रुग्णालय सुविधांचा आढावा
कासा, ता. २७ (बातमीदार) : डहाणू तालुक्यातील आशागड प्राथमिक आरोग्य केंद्राला आमदार विनोद निकोले यांनी गुरुवारी (ता. २७) भेट देऊन रुग्णांशी संवाद साधला आणि उपचार व्यवस्थेचा सविस्तर आढावा घेतला. मागील महिन्यात निकामी झालेली वातानुकूलित यंत्रणा बदलून, आमदार निकोले यांनी स्वखर्चातून नवी यंत्रणा बसवली. त्यामुळे शस्त्रक्रिय गृहाची सुविधा पुन्हा सुरू झाली. तर मागील काही दिवसांपासून विस्कळीत झालेला पिण्याच्या पाण्याचा पुरवठा त्यांच्या पाठपुराव्यामुळे तात्काळ नियमित करण्यात आला.
निकोले यांनी आरोग्य केंद्रातील स्वच्छता, औषधसाठा आणि इतर सुविधांची पाहणी करून आवश्यक त्या सुधारणा वेळेत करण्याच्या सूचना संबंधित विभागाला दिल्या. यावेळी आशागडचे उपसरपंच दीपेश दोडा, सदस्य गौरव ठाकूर, ग्रामविकास अधिकारी राहुल पाटील आणि वैद्यकीय अधिकारी डॉ. एस. पांचाळ आदी मान्यवर उपस्थित होते.