अजित पवारांची शुक्रवारी सभा
खोपोलीत परिवर्तन आघाडीचा प्रचार करणार
खालापूर, ता.२७(बातमीदार)ः खोपोली नगरपरिषद निवडणूक प्रचाराची रंगत वाढली आहे. अशातच रोखठोक भाषण शैलीसाठी ओळखले जाणारे उपमुख्यमंत्री अजित पवार शुक्रवारी परिवर्तन आघाडीसाठी खोपोलीत जाहीर सभा घेणार असल्याने खोपोलीकरांमध्ये उत्सुकता आहे.
थेट नगराध्यक्ष पदासाठी परिवर्तन आघाडी तर्फे राष्ट्रवादी काँग्रेस अजित पवार गटाचे सुनील पाटील मैदानात आहेत. सुनील पाटील यापूर्वी माजी नगराध्यक्ष म्हणून कार्यरत होते. परंतु, विधानसभा निवडणुकीच्या काळात आमदार महेंद्र थोरवे यांनी त्यांना शिंदे गटात घेत चमत्कार घडवला होता. पण आता राष्ट्रवादी काँग्रेस पार्टीचे प्रदेशाध्यक्ष खासदार सुनील तटकरे यांनी सुनील पाटील यांना पुन्हा राष्ट्रवादीत प्रवेश देत नगराध्यक्ष पदाचे तिकीट दिले आहे. शिंदे गटाला लढत देईल, असा तुल्यबळ उमेदवार असल्याने म्हणून पक्षाने पूर्ण ताकद उभी केली आहे. अशातच शिंदे गटाचे कुलदीप शेंडे यांच्यासाठी उद्योग मंत्री उदय सामंत यांनी खोपोली सभा घेतल्यानंतर आता राष्ट्रवादीकडून उपमुख्यमंत्री अजित पवार सभा घेणार आहेत. त्यामुळे खोपोलीत आल्यानंतर कोणत्या मुद्द्यावर बोलणार याबाबत मतदार लक्ष ठेऊन गेले आहेत.