भांडुप परिमंडळात वीज देयक वसुली
मोहीम जोरात सुरू

सकाळ वृत्तसेवा
मुंबई, ता. २८ : सध्या संपूर्ण भांडुप परिमंडळात वीजबिल वसुली मोहीम चालू आहे. यामध्ये थकबाकी असलेल्या २७,४९८ ग्राहकांचा वीजपुरवठा खंडित करण्यात आला आहे. त्या पार्श्वभूमीवर ग्राहकांना सुट्टीच्या दिवशीही सहजपणे वीजबिल भरता यावे म्हणून भांडुप परिमंडळातील वीजबिल भरणा केंद्र सुट्टीच्या दिवशीही सुरू ठेवण्यात येणार आहे.
२९ आणि ३० नोव्हेंबर या सुट्टीच्या दिवशी सर्व अधिकृत वीजबिल भरणा केंद्रे सुरू राहणार असून, ग्राहकांनी वीजबिल भरून सहकार्य करावे, असे आवाहन महावितरणतर्फे करण्यात आले आहे. वीजबिल भरणा केंद्रासह महावितरणने वीजबिल भरण्याचे विविध पर्याय उपलब्ध करून दिले आहेत. ऑनलाइन वीजबिलाचा भरणा केल्यास १० रुपयांची सूट मिळत आहे. महावितरणच्या संकेतस्थळावर किंवा महावितरणच्या मोबाईल ॲप तसेच ऑफलाइन पर्याय जसे की बँक, खासगी खात्रीशीर भरणा केंद्रांचा वापर करता येतो. ग्राहकांनी अखंडित वीजसेवेसाठी उपलब्ध सुविधांचा उपयोग करून चालू व थकीत वीजबिलाचा भरणा करावा, असे आवाहन भांडुप परिमंडलाचे मुख्य अभियंता संजय पाटील यांनी केले आहे.