जिल्हाधिकाऱ्यांकडून मुंबई–वडोदरा
द्रुतगती मार्गाच्या कामांची पाहणी
पालघर, ता. २९ (बातमीदार) : पालघर जिल्ह्याच्या जिल्हाधिकारी डॉ. इंदुराणी जाखड यांनी मुंबई-वडोदरा द्रुतगती मार्गाच्या सुरू असलेल्या कामांची पाहणी केली. कामाची गती वाढवावी, तसेच सुरक्षा व्यवस्था आणि वाहतूक मार्गांचे पर्यायी नियोजन जलदगतीने पूर्ण करण्याच्या सूचना त्यांनी संबंधित अधिकाऱ्यांना दिल्या. डॉ. जाखड यांनी कामाच्या प्रगतीचा आढावा घेतला आणि द्रुतगती मार्गाचे काम लवकर पूर्ण करण्याचे निर्देश दिले.
या पाहणी दौऱ्यादरम्यान, डॉ. जाखड यांनी वरवाडा येथील मुलींच्या शासकीय आश्रमशाळेला अचानक भेट देऊन विद्यार्थिनींशी संवाद साधला. त्यांनी शाळेतील शैक्षणिक सुविधा, निवास व्यवस्था, आहार, स्वच्छता आणि सुरक्षा यांची पाहणी केली. विद्यार्थिनींच्या अडचणी जाणून घेऊन त्यावर तातडीने उपाययोजना करण्याच्या सूचना त्यांनी अधिकारी वर्गाला दिल्या.
यावेळी पोलिस अधीक्षक यतीश देशमुख, सहायक जिल्हाधिकारी तथा डहाणू प्रकल्प अधिकारी विशाल खत्री आणि राष्ट्रीय महामार्ग प्राधिकरण, ठाणे येथील व्यवस्थापक उपस्थित होते.
जिल्हा प्रशासनाचे शैक्षणिक संस्थांच्या सुविधा उंचावणे आणि महत्वाच्या पायाभूत प्रकल्पांना वेग देणे, हे प्रथम प्राधान्य असल्याचे डॉ. जाखड यांनी यावेळी स्पष्ट केले.