रोझरी कॉन्व्हेंटच्या विद्यार्थ्यांची संविधान जागरूकता रॅली
मुंब्रा, ता. २९ ः रोझरी कॉन्व्हेंट हायस्कूल ॲण्ड ज्युनिअर कॉलेजमध्ये संविधान दिन उत्साहात साजरा करण्यात आला. विद्यार्थ्यांमध्ये भारतीय संविधानाची माहिती, त्यातील मूल्ये आणि नागरिक म्हणून असलेल्या कर्तव्यांविषयी जागरूकता निर्माण करणे हा या कार्यक्रमाचा मुख्य उद्देश होता.
यानिमित्‍त संविधान जागरूकता रॅली काढण्यात असून विद्यार्थ्यांनी हातात आकर्षक, मनोवेधक आणि संदेशपूर्ण पोस्टर्स धरले होते. या पोस्टर्सद्वारे न्याय, स्वातंत्र्य, समता आणि बंधुता या संविधानिक मूल्यांचा प्रभावी संदेश जनतेपर्यंत पोहोचविण्यात आला. रॅलीत विद्यार्थ्यांचा उत्साह आणि देशप्रेमाची झलक स्पष्टपणे दिसून आली.
शाळेच्या गणवेशातील विद्यार्थ्यांनी प्रस्तावना, मूलभूत अधिकार आणि कर्तव्ये, राष्ट्रनिष्ठा दर्शविणारे सुंदर चार्ट्स व चित्रे तयार केली होती. प्राचार्यांनी सर्व विद्यार्थी आणि शिक्षकांच्या परिश्रमांचे कौतुक करत सांगितले की, अशा उपक्रमांमुळे विद्यार्थ्यांमध्ये संविधानिक मूल्यांची जपणूक करण्याची प्रेरणा अधिक दृढ होते. कार्यक्रमाचा समारोप विद्यार्थ्यांनी संविधानातील मूल्यांचे पालन करण्याची शपथ घेत केला.