स्थगितीमुळे बदलापूरमध्ये संताप
सहा प्रभागांतील उमेदवारांचा आयोगाच्या पत्रकार परिषदेत गोंधळ
बदलापूर, ता. ३० (बातमीदार) ः पालिकेच्या सहा प्रभागांची निवडणूक स्थगित झाली आहे. प्रभाग क्रमांक ५(ब), १५(ब), १७ (अ), १०(ब), ८(अ) या पाच जागांवर आता शनिवारी (ता. २०) मतदान होणार आहे. दरम्यान, या प्रभागांतील उमेदवारांनी निवडणूक आयोगाच्या पत्रकार परिषदेत मोठा गोंधळ घातला.
गेल्या अनेक दिवसांपासून उत्साहात प्रचार करणारे उमेदवार अचानक स्थगितीने हैराण झाले आहेत. हा लोकशाहीला घातक निर्णय, आमच्या नेतृत्वाचा आवाज दाबण्याचा प्रयत्न असल्याच्या आरोपांसह उमेदवारांनी आयोगावर नाराजी व्यक्त केली. स्थगितीमुळे मतदारांमध्येही मोठा संभ्रम निर्माण होणार असल्याचे उमेदवारांचे म्हणणे आहे.
---
संभ्रम वाढला
या उमेदवारांकडून आयोगाला अनेक प्रश्न उपस्थित करण्यात आले आहेत; परंतु निवडणूक निर्णय अधिकारी विश्वास गुजर यांनी या प्रश्नांची उत्तरे न्यायालयाच्या अखत्यारित आहेत. आम्ही सध्या काही सांगू शकत नाही, असे स्पष्ट केले. त्यामुळे उमेदवारांमध्ये संभ्रम वाढला आहे. प्रभाग १०(ब) मधील उमेदवार दक्षता तांबे यांनीही तीव्र नाराजी व्यक्त करत सांगितले, की आम्ही मतदारांशी प्रत्यक्ष संपर्क साधत प्रचार केला. आता अचानक काय करावे? २ डिसेंबरचे मतदान आणि २० तारखेची परिस्थिती कशी असेल, हा मोठा प्रश्न आहे. परिणामी, पालिकेची सत्ता कोणाच्या हातात जाणार, हेही सर्वांसाठी सध्या एक मोठे अनुत्तरित कोडे बनले आहे.