कासा, ता. २ (बातमीदार) : डहाणू नगर परिषद निवडणुकीत मतदान प्रक्रिया सकाळी संथ गतीने सुरू झाली असली तरी दुपारनंतर मतदारांच्या मोठ्या गर्दीमुळे केंद्रांवर उत्साहाचे वातावरण पाहायला मिळाले, मात्र बूथ क्रमांक ११ वर दुपारच्या सुमारास तणावाची परिस्थिती निर्माण झाली होती. शिवसेना शिंदे गट आणि भाजप समर्थकांमध्ये वाकयुद्ध चांगलेच रंगले.

शिवसेनेचे नगराध्यक्षपदाचे उमेदवार राजेंद्र माच्छी आणि भाजप कार्यकर्त्यांमध्ये वाद झाल्याने वातावरण काही काळासाठी तंग झाले. भाजपचे काही कार्यकर्ते मतदान केंद्र परिसरात मोठ्या संख्येने गोळा झाल्यामुळे शिवसेनेने निषेध नोंदवला. या कारणावरून दोन्ही गटांमध्ये वाकयुद्ध झाले आणि धक्काबुक्कीपर्यंत प्रकरण गेले. प्रसंगाची माहिती मिळताच पोलिसांनी हस्तक्षेप करून स्थिती नियंत्रणात आणली. पोलिसांच्या मध्यस्थीनंतर दोन्ही गट शांत झाले आणि मतदान प्रक्रिया सुरळीतपणे सुरू राहिली.

डहाणूतील मतदान शांततेत पार पाडण्यासाठी पोलिसांनी सुरक्षा वाढवली होती. पुढील तणाव टाळण्यासाठी मतदान केंद्र परिसरात बंदोबस्त वाढवण्यात आला आहे.