गणेशपुरी ग्रामपंचायतीतर्फे दिव्यांगाना धनादेशचे वाटप
वज्रेश्वरी, ता.३ (बातमीदार) : भिवंडी तालुक्यातील ग्रुप ग्रामपंचायत गणेशपुरी यांच्या वतीने शासनाच्या आदेशानुसार दिव्यांग व्यक्तींसाठी राखीव असलेल्या ५ टक्के निधीचे वाटप करण्यात आले. सन २०२५-२६ या वर्षासाठी ग्रामपंचायतीच्या स्व-निधीतून एकूण ५८ दिव्यांग व्यक्तींना प्रत्येकी दोन हजार रुपयांप्रमाणे आर्थिक मदत करण्यात आली.
सरपंच संदीप खिराडे यांच्या मार्गदर्शनाखाली उपसरपंच प्रकाश सुतार, ग्रामपंचायत सदस्य आणि ग्रामविकास अधिकारी प्रमोद भोईर यांच्या हस्ते उपस्थित दिव्यांग व्यक्तींना धनादेशाचे वाटप करण्यात आले. यावेळी ग्रामविकास अधिकारी प्रमोद भोईर यांनी शासनाच्या विविध दिव्यांग योजनांची माहितीही उपस्थितांना दिली. यावेळी ग्रामस्थ आणि ग्रामपंचायत कर्मचारी मोठ्या संख्येने उपस्थित होते.