भांडुपमधील ‘दिना बामा पाटील रंगमंचा’चा विस्तार
मुलुंड, ता. ३ (बातमीदार) : ईशान्य मुंबईतील नाट्यकलेला प्रोत्साहन देण्यासाठी भांडुप येथील स्व. दिना बामा पाटील रंगमंचाचा विस्तार आणि नूतनीकरण पूर्ण झाले आहे. यामुळे भांडुप, कांजूरमार्ग आणि आसपासच्या परिसरातील कलाकारांना सरावासाठी आणि सांस्कृतिक कार्यक्रमांसाठी आधुनिक सोयीसुविधांनी युक्त प्रशस्त जागा उपलब्ध झाली आहे.
स्थानिक कलाकारांना सरावासाठी मुंबईतील दूरच्या भागांमध्ये जावे लागत होते. ही गैरसोय दूर करण्यासाठी आणि सांस्कृतिक-सामाजिक कार्यक्रमांसाठी व्यासपीठ उपलब्ध व्हावे, म्हणून हा विस्तार करण्यात आला. खासदार संजय दिना पाटील यांच्या खासदार स्थानिक विकास निधीतून हे विस्तारीकरण करण्यात आले. शिवसेना ठाकरे गटाचे आमदार सुनील राऊत यांच्या हस्ते सोमवारी (ता. १) या नूतनीकृत रंगमंचाचा शुभारंभ करण्यात आला. आता हा रंगमंच आधुनिक सोयीसुविधांनी युक्त बहुउद्देशीय स्वरूपात भांडुपकरांच्या सेवेत सज्ज झाला आहे.
या विस्तारामुळे भांडुपमधील नाट्यकलावंत, सांस्कृतिक संस्था आणि कलाप्रेमींना मोठा दिलासा मिळाला असून, परिसरातील कला चळवळीला नवे बळ मिळणार असल्याची भावना येथील कलाकारांनी व्यक्त केली.