विवेक विद्यालयात विज्ञान प्रदर्शनाची धूम
घाटकोपर, ता. ३ (बातमीदार) : विद्यार्थ्यांमध्ये वैज्ञानिक दृष्टिकोन वाढीस लागावा यासाठी घाटकोपर, पार्कसाईट येथील विवेक विद्यालयात नुकतेच शालेय विज्ञान प्रदर्शन उत्साहात आयोजित करण्यात आले होते.
या प्रदर्शनात पर्यावरण, सोलार ऊर्जा, प्रदूषण, पर्जन्य, शहरीकरण आणि शेती यांसारख्या विविध महत्त्वाच्या विषयांवर आधारित एकूण ९० प्रकल्प विद्यार्थ्यांनी मांडले. बाल वैज्ञानिकांनी (विद्यार्थ्यांनी) त्यांच्या प्रकल्पांची माहिती मान्यवर व परीक्षकांना आत्मविश्वासाने दिली आणि विचारलेल्या प्रश्नांची समर्पक उत्तरे दिली. आर. आर. एज्युकेशन संस्थेचे संचालक प्रभाकर भोईटे, मल्टीपर्पज टेक्निकल शाळेचे मुख्याध्यापक संतोष भारमळ, अग्रसेन विद्यालयाचे मुख्याध्यापक अशोक परदेशी, तसेच शाळेच्या सचिव विमल थोरात यांनी प्रदर्शनाला भेट दिली. विभागातील नागरिक आणि विविध शाळांच्या विद्यार्थ्यांनीही प्रकल्पांची माहिती घेतली.
शाळेचे मुख्याध्यापक विवेक थोरात यांनी विद्यार्थ्यांमध्ये विज्ञानाची आवड निर्माण करण्यासाठी असे उपक्रम यापुढेही राबवण्याचे आश्वासन दिले. तसेच पालकांनी दिलेल्या प्रतिसादाबद्दल त्यांचे आभार मानले. हे प्रदर्शन यशस्वी करण्यासाठी विज्ञान शिक्षक आणि इतर शिक्षकांनी उत्तम नियोजन केले.