गतिरोधक बनले जिवघेणे
कांदिवलीतील मुख्य मार्गांवर अपघाताचा धोका
कांदिवली, ता. ३ (बातमीदार) ः कांदिवली पश्चिमेतील महात्मा गांधी मार्ग, बंदर पाखाडी मार्ग या मुख्य मार्गांवर गतिरोधकांची दयनीय अवस्था झाली आहे. त्‍यामुळे अपघाताची भीती वर्तवण्यात येत आहे.
रस्‍त्‍यांसाठी कोट्यवधी रुपये खर्च करणाऱ्या पालिकेला गतिरोधकांचा विसर पडल्याने जीव मुठीत घेऊनच नागरिकांना प्रवास करावा लागत आहे. पालिकेने तातडीने डागडुजी वा नूतनीकरण करून नागरिकांसह वाहन चालकांना दिलासा द्यावा, अशी मागणी केली जात आहे.
महात्मा गांधी मार्ग, काड सिद्धेश्वर मार्ग, बंदर पाखाडीकडे जाणाऱ्या मार्गांवरील गतिरोधक, हे धोकादायक, जीवघेणे झाले आहेत. दुचाकीस्वार, तीन चाकी वाहनांना जीवघेणी कसरत करावी लागत आहे. तुटलेले, अर्धवट, विचित्र आकाराचे दुभाजक दिसत आहेत. गतिरोधक बनवताना पालिकेकडून नियमांची पायमल्ली झाल्याचा आरोप केला जात आहे.
रस्‍त्‍यांची कामे सुरू असून, गतिरोधकांची डागडुजी तसेच गरजेनुसार योग्य कामे केली जातील, अशी प्रतिक्रिया आर दक्षिण विभागातील अभियंता अक्षय जोशी यांनी दिली.

दुचाकीस्वारांना येथून प्रवास करणे खूपच धोकादायक झाले आहे. पालिकेचे उपाययोजनांकडे दुर्लक्ष होत असून, रस्‍त्‍यांची डागडुजी करणे आवश्‍यक आहे.
स्वप्नील कैले, दुचाकीस्‍वार