बाल निरीक्षण सुधारगृहात अल्पवयीन मुलींमध्ये हाणामारी
उल्हासनगर, ता. ३ (वार्ताहर) ः शहरातील गांधी रोड परिसरातील मुलींच्या बाल निरीक्षण सुधारगृह आणि विशेषगृहात अल्पवयीन मुलींमध्येच हाणामारीची एक धक्कादायक घटना उघडकीस आली आहे. मंगळवारी (ता. २) सकाळी ८ वाजता पाणी भरण्यावरून सुरू झालेल्या एका किरकोळ वादाने क्षणातच हिंसक रूप धारण केले.

मिळालेल्या माहितीनुसार, सुधारगृहात राहणाऱ्या एका १७ वर्षीय मुलीने तिच्यासोबत राहणाऱ्या दुसऱ्या मुलीला ‘तू पाणी का भरत नाहीस?’ असे म्हणून शिवीगाळ करत मारहाण केली. वाद वाढल्यानंतर आरोपी मुलीने पीडित मुलीला हाताच्या ठोश्याबुक्क्यांनी मारले. त्यानंतर जवळच पडलेला लाकडी दांडका उचलून पीडित मुलीच्या उजव्या मांडीवर मागील बाजूने जोरात प्रहार केला. या झटापटीत पीडित मुलीच्या तोंडालाही किरकोळ जखमा झाल्या आहेत.

सुधारगृहातील अधिपरिचारिका सुनीता कांबळे यांनी ही घटना पाहताच तातडीने हिललाइन पोलिस ठाण्यात तक्रार नोंदवली. पोलिसांनी आरोपी अल्पवयीन मुलीविरुद्ध मारहाणीचा गुन्हा (कलम) नोंदवून तपास सुरू केला आहे. मारहाण झालेल्या दोन्ही मुली सध्या सुधारगृहातच दाखल आहेत.