हँकॉक पुलाची कामे तातडीने करा!
सकाळ वृत्तसेवा
मुंबई, ता. ३ : माझगाव-डोंगरीला जोडणाऱ्या महत्त्वाच्या हँकॉक उड्डाणपूल प्रकल्पाचा वेग वाढवण्यासाठी महापालिका प्रशासनाने कडक भूमिका घेतली आहे. अतिरिक्त महापालिका आयुक्त (प्रकल्प) अभिजित बांगर यांनी उर्वरित कामे नियोजनबद्धरीतीने व प्राधान्याने पूर्ण करण्याचे स्पष्ट निर्देश दिले.
पोलिस सहआयुक्त (वाहतूक) अनिल कुंभारे यांच्या उपस्थितीत घेण्यात आलेल्या संयुक्त आढावा बैठकीत हे निर्देश देण्यात आले. भायखळा-सँडहर्स्ट रोड यादरम्यानचा हँकॉक पूल मध्य रेल्वेने जानेवारी २०१६ मध्ये जीर्ण झाल्यामुळे पाडला होता. त्यानंतर महापालिकेने हा पूल फेब्रुवारी २०२० मध्ये पुन्हा बांधून पूर्ण केला. ऑगस्ट २०२२ मध्ये पुलाची एक बाजू वाहतुकीसाठी खुली करण्यात आली, मात्र दोन्ही बाजूंच्या पोहोच रस्त्यांची कामे अद्याप पूर्ण न झाल्याने प्रकल्प अपूर्ण अवस्थेत आहे.
उर्वरित कामे जलद गतीने मार्गी लावण्यासाठी महापालिकेला आवश्यक निविदा प्राधान्याने प्रसिद्ध करण्याचे निर्देश देण्यात आले. पोहोच रस्त्यांचे रुंदीकरण, उपलब्ध रस्त्याची क्षमता आणि पूरक कामे वेळेत पूर्ण करून स्थानिक नागरिकांना दिलासा देण्याची अपेक्षा बांगर यांनी व्यक्त केली.