‘ऑल इंडिया बार’ परीक्षेत अनियमितता?
विद्यार्थ्यांची न्यायालयीन हस्तक्षेपाची मागणी
सकाळ वृत्तसेवा
मुंबई, ता. ३ : बॉम्बे सिटी लॉयर ग्रुप्समधील कायद्याचे पदवीधर आणि तरुण वकिलांच्या एका समूहाने राज्यभरात रविवारी (ता. ३० नोव्हेंबर) पार पडलेल्या ऑल इंडिया बार परीक्षेदरम्यान अनियमितता आढळल्याचा आरोप केला. तसेच याप्रकरणी स्वत:हून हस्तक्षेप करण्याची विनंती सर्वोच्च न्यायालय आणि मुंबई उच्च न्यायालयाकडे पत्राद्वारे केली आहे.
मुंबई, नवी मुंबई, ठाणे, नालासोपारा तसेच वसई केंद्रांवर झालेल्या गंभीर प्रशासकीय त्रुटींचा पत्रात उल्लेख केला आहे. बार काउंसिल ऑफ इंडिया (बीसीआय), महाराष्ट्र आणि गोवा राज्य बार काउन्सिल तसेच परीक्षा घेणाऱ्या यंत्रणेला मूलभूत सोयीसुविधा, स्वच्छता आणि सुरक्षा पुरवण्यात अपयश आल्याचा आरोप केला आहे.
अनेक परीक्षा केंद्र वाहतुकीच्या दृष्टीने गैरसोयीच्या ठिकाणी होती. त्यामुळे ज्येष्ठ नागरिक, महिला आणि दिव्यांग परीक्षार्थ्यांना मोठ्या अडचणींना सामोरे जावे लागले. परीक्षार्थ्यांनी अतिगर्दीच्या वर्गखोल्या, तुटलेली आसने, अपुरी वायुवीजन व्यवस्था आदींबाबत तक्रारी केल्या. अनेक केंद्रांवर स्वच्छतागृहे, पिण्याच्या पाण्याची व्यवस्था, प्राथमिक उपचार सुविधा नसल्याबाबत आरोपही पत्रात केला आहे.
----
पर्यवेक्षण समिती स्थापन करा!
परीक्षेसाठी नेमण्यात आलेले निरीक्षक आणि कर्मचारी प्रक्रियेबाबत अनभिज्ञ होते. तक्रार निवारण कक्ष किंवा कार्यवाहीची कोणतीही यंत्रणा उपलब्ध नव्हती. अपुऱ्या सुविधांबाबत संबंधितांवर जबाबदारी निश्चित करावी, भविष्यात अशा परीक्षांसाठी मार्गदर्शक तत्त्वे तयार करावीत आणि देशभरातील परीक्षा व्यवस्थापनात सुधारणा करण्यासाठी निवृत्त न्यायमूर्ती, वरिष्ठ वकील आणि शिक्षणतज्ज्ञांचा समावेश असलेली उच्चस्तरीय पर्यवेक्षण समिती स्थापन करण्याची मागणीही पत्राद्वारे विद्यार्थ्यांनी केली आहे.