पालिकेसमोर श्रमजीवी संघटनेचे बेमुदत आंदोलन
सकाळ वृत्तसेवा
डोंबिवली, ता. ४ ः कल्याण-डोंबिवली पालिकेतील कंत्राटी सफाई कामगार आणि वाहनचालक कामगारांवर ठेकेदाराकडून होत असलेल्या अन्याय-अत्याचाराविरोधात श्रमजीवी रयत कामगार संघटनेने गुरुवारी (ता. ४) मुख्यालयावर मोर्चा काढला असून, बेमुदत आंदोलनाला सुरुवात केली आहे.
शहर स्वच्छ ठेवण्यासाठी रात्रंदिवस मेहनत करणाऱ्या सफाई कामगारांना कामगार हक्क कायद्यांनुसार मिळणाऱ्या सुविधा, किमान वेतन, ओव्हरटाईमचा मोबदला आणि सुट्ट्या मिळत नाहीत, अशी गंभीर परिस्थिती संघटनेने मांडली. पालिका प्रशासनाने कामगारांना मूलभूत सुविधा आणि आवश्यक संरक्षणात्मक साधने न पुरवल्याचा आरोपही संघटनेने केला आहे. कामगारांच्या वेतनात तफावत, सुट्टीचा अभाव, किमान वेतन कायद्याचे उल्लंघन यांसारख्या मुद्द्यांवर संघटना ठाम आहे. या सर्व मागण्यांसाठी पालिका मुख्यालयावर मोठ्या प्रमाणात कामगारांनी धडक दिली. श्रमजीवी रयत कामगार संघटनेचे जिल्हा सरचिटणीस राजेश चन्ने यांनी आम्ही कामगारांसह जेवणाची आणि राहण्याची सर्व सोय करून आलो आहोत. जोपर्यंत कामगारांच्या मागण्या मान्य होत नाहीत, तोपर्यंत आम्ही मुख्यालयासमोरून हलणार नाही. या आंदोलनात शहरातील मोठ्या संख्येने सफाई कामगार सहभागी झाले असल्याचे त्यांनी सांगितले.