जोगेश्वरी-अंधेरी सहकारी संस्थांना दिलासा
जोगेश्वरी, ता. ४ (बातमीदार) : जोगेश्वरी-अंधेरी परिसरातील सहकारी गृहनिर्माण संस्थांसाठी एक दिलासादायक बातमी आहे. अनेक महिन्यांच्या पाठपुराव्यानंतर उपनिबंधक व सह-निबंधक, सहकारी संस्था (के/पूर्व विभाग) यांचे कार्यालय अखेर वडाळा येथून स्थलांतरित होऊन बृहन्मुंबई महानगरपालिकेच्या के/पूर्व विभागात हलवण्यात आले आहे.
या नव्या कार्यालयाचे उद्घाटन शुक्रवारी (ता. ५) शिवसेना ठाकरे गटाचे आमदार बाळा नर यांच्या प्रमुख उपस्थितीत होणार आहे. यापूर्वी हे कार्यालय वडाळा येथे असल्याने, जोगेश्वरी-अंधेरी परिसरातील नागरिकांना नोंदणी, तक्रार निवारण, लेखा तपासणी इत्यादी कामांसाठी लांबचा आणि गैरसोयीचा प्रवास करावा लागत होता. कार्यालयाच्या या स्थलांतरामुळे परिसरातील शेकडो सहकारी गृहनिर्माण संस्थांचा वेळ, खर्च आणि प्रवासाची गैरसोय टळणार आहे. स्थानिक नागरिक आणि सहकारी संस्थांच्या प्रतिनिधींनी केलेल्या सातत्यपूर्ण पाठपुराव्यानंतर उपनिबंधक (पूर्व विभाग) यांनी हा निर्णय घेतला आहे.