फोटो आहे
चिपळे पूल ते नेरे रस्ता दुरुस्तीला तातडीने सुरुवात
पनवेल ता. ४( बातमीदार)ः गेले काही महिन्यांपासून अतिशय दैनावस्थेत असलेल्या चिपळे पूल ते नेरे रस्त्याच्या दुरुस्ती कामाला गुरुवारपासून सुरुवात करण्यात आली. या रस्त्यावर ठिकठिकाणी झालेले मोठे खड्डे आणि उखडलेले रस्त्याचे भाग यामुळे नागरिक आणि वाहनचालकांना प्रचंड त्रास सहन करावा लागत होता. अखेर या समस्येवर उपाययोजना सुरू झाल्याने नागरिकांनी दिलासा व्यक्त केला आहे.
पूर्वी सार्वजनिक बांधकाम विभागाच्या अखत्यारीत असलेला हा रस्ता हस्तांतरणानंतर सिडकोच्या नैना क्षेत्रात समाविष्ट झाला आहे. आमदार प्रशांत ठाकूर यांनी नागरिकांच्या तक्रारी गांभीर्याने घेत तातडीने रस्त्यांच्या दुरुस्तीची मागणी केली होती. याबाबत ठाकूर यांनी सिडकोचे व्यवस्थापकीय संचालक विजय सिंघल यांना निवेदन देत कार्यवाहीचे निर्देश दिले होते. ठाकूर यांच्या पाठपुराव्यानंतरच प्रत्यक्ष दुरुस्ती कामाला सुरुवात झाली.