संविधानाची तत्त्वे बुद्धांच्या विचारांतून - डॉ. यशवंत चावरे
नवी मुंबई, ता. ४ : खारघर येथील व्हॅली गोल्फ कोर्सवर आयोजित संविधान जागरूकता व्याख्यानमालेत निवृत्त न्यायाधीश डॉ. यशवंत चावरे यांनी भारतीय संविधानामुळे सर्व समाजघटकांच्या उन्नतीचा मार्ग मोकळा झाला असल्याचे सांगितले. या कार्यक्रमाला निवृत्त जिल्हा न्यायाधीश डॉ. यशवंत चावरे व विचारवंत प्रा. दामोदर मोरे यांची प्रमुख उपस्थिती होती.
संविधानातील दर्जा व संधीची समानता या तरतुदीमुळे विशेषतः महिला आणि अनुसूचित जाती-जमातीच्या लोकांना उन्नती करण्यासाठी, प्रतिष्ठेने जगण्याची, सन्मान प्राप्त करण्याची संधी मिळाल्याचे यशवंत चावरे यांनी सांगितले. साहित्यिक प्रा. दामोदर मोरे यांनी संविधानातील स्वातंत्र्य, समता आणि बंधुता ही तत्त्वे डॉ. बाबासाहेब आंबेडकर यांनी बुद्धांच्या तत्त्वज्ञानातून घेतली असल्याचे स्पष्ट केले. मोरे यांनी लोकशाही टिकवण्यासाठी संविधानिक पंचशीलाचे पालन आवश्यक असल्याचा संदेश दिला. कार्यक्रमाचे प्रास्ताविक अजय तु. फुलमाळी आणि आभारप्रदर्शन शरद कांबळे यांनी केले.