गावठी दारूसह एकाला अटक
ठाणे, ता. ५ : भिवंडी, आलिमघर येथे एक हजार ११५ लिटर हातभट्टीची दारू पोलिसांनी जप्त केली. याप्रकरणी रुपेश नारायण पाटील (३५) याला पोलिसांनी अटक केली. जप्त केलेल्या दारूची किंमत एक लाख ११ हजार ५०० रुपये असल्याची माहिती ठाणे शहर पोलिस जनसंपर्क अधिकारी तथा वरिष्ठ पोलिस निरीक्षक शैलेश साळवी यांनी दिली. भिवंडी गुन्हे शाखेचे पोलिस हवालदार किशोर थोरात यांना मिळालेल्या गोपनीय बातमीच्या आधारे वरिष्ठ पोलिस निरीक्षक जनार्दन सोनवणे यांच्या मार्गदर्शनाखाली पोलिस उपनिरीक्षक रामचंद्र जाधव यांच्या पथकाने रुपेश पाटील यांच्या भिवंडी आलिमघर येथील राहत्या घराच्या शेजारी असलेल्या खोलीमध्ये छापा टाकला. त्या वेळी एक हजार ११५ लिटर हातभट्टीची तयार दारू जप्त केली.