मराठी माणसाला घर देण्यास नकार?
भाईंदर, ता. ५ (बातमीदार) : मराठी माणसाला विकसकाने घर देण्यास नकार दिल्याची घटना भाईंदर पश्चिम येथे घडली आहे. याप्रकरणी विकसकावर गुन्हा दाखल करण्याची मागणी करण्यात आली आहे.
रवींद्र खरात हे भाईंदर पश्चिम भागात एक बांधकाम सुरू असलेल्या इमारतीत घर पाहण्यासाठी गेले होते, मात्र जैन, मारवाडी किंवा ब्राम्हण असाल, तरच घर मिळेल, असे त्यांना सांगण्यात आले. आपली जात व आहार विचारून आपल्याला घर नाकारण्यात आल्याचा आरोप रवींद्र खरात यांनी केला आहे. याप्रकरणी विकसकावर फौजदारी गुन्हा दाखल करावा, अशी मागणी खरात यांनी पोलिस आयुक्तांकडे केली असून, यासंदर्भात मुख्यमंत्री व उपमुख्यमंत्र्यांकडेही त्यांनी ई-मेलद्वारे तक्रार केली आहे.