आमदारांकडून आनंद दिघे पुलाच्या कामाची पाहणी
समाधानकारक काम न झाल्यास पूल पुन्हा बंद करण्याचा इशारा
कल्याण, ता. ६ (वार्ताहर) : कल्याण पूर्व आणि पश्चिमेला जोडणारा धर्मवीर आनंद दिघे पूल हा डागडुजीसाठी बंद करण्यात आला होता. या पुलाच्या कामाची कल्याण पूर्वच्या भाजपा आमदार सुलभा गायकवाड यांनी पालिका अधिकारी आणि भाजपा पदाधिकारी यांच्यासमवेत पाहणी केली. या पुलाचे काम काही ठिकाणी समाधानकारक नसून, येत्या चार ते पाच दिवसांत यातील त्रुटी दूर न केल्यास हा पूल पुन्हा बंद करण्याचा इशारा सुलभा गायकवाड यांनी दिला. तर लवकरच वालधुनी पूल आणि प्रल्हाद शिंदे पुलाचीदेखील डागडुजी करण्यात येणार असल्याचे गायकवाड यांनी सांगितले.
पावसाळ्यात झालेल्या खड्ड्यांमुळे शहाड येथील उड्डाणपूल काही दिवस बंद ठेवून त्या पुलाची डागडुजी करण्यात आली. हा पूल बंद ठेवल्याने कल्याणसह आजूबाजूच्या परिसरात मोठ्या वाहतूक कोंडीचा सामना करावा लागला होता. त्यानंतर वालधुनी परिसरात कल्याण पूर्व-पश्चिमला जोडणारा धर्मवीर आनंद दिघे उड्डाणपूलदेखील डागडुजीसाठी बंद करण्यात आला होता. हा उड्डाणपूल नागरिकांच्या सोयीसाठी शुक्रवारपासून वाहतुकीसाठी खुला करण्यात आला आहे.
वाहनचालकांच्या सुरक्षिततेला प्राधान्य देत या पुलाचे आवश्यक त्या ठिकाणी पुन्हा डांबरीकरण करण्यात आले आहे. कामाची गुणवत्ता, सुरक्षितता व अंतिम तयारी यांची प्रत्यक्ष पाहणी करून संबंधित अधिकाऱ्यांना आवश्यक ते आदेश दिले. या पाहणीदरम्यान पालिकेच्या कार्यकारी अभियंता रोहिणी लोकरे, कल्याण पूर्व विधानसभा निवडणूक प्रमुख संजय मोरे, माजी नगरसेवक अभिमन्यू गायकवाड, मनोज राय, प्रमोद पिंगळे, मंडळ अध्यक्ष विजय उपाध्याय आणि इतर अधिकारी व कर्मचारी उपस्थित होते.