पूर्वसूचना कशी दिली जाते?
चक्रीवादळांमुळे होणारे नुकसान कमी करण्यासाठी पूर्वसूचना आणि इशारे दिले जातात. भारतीय हवामान खाते आणि राष्ट्रीय आपत्ती व्यवस्थापन प्राधिकरण विविध अत्याधुनिक तंत्रज्ञानाचा वापर करतात. सॅटेलाइट इमेजिंग, जीआयएस मॅपिंग, रडार सिस्टीम, विविध अ‍ॅप्स आणि ड्रोनचा वापर करतात.
---
सॅटेलाइट इमेजिंग : भारतीय हवामान विभाग उपग्रहीय छायाचित्रांद्वारे चक्रीवादळाचा मार्ग, वाऱ्याचा वेग आणि पावसाच्या शक्यतेबाबत माहिती देते. त्यासाठी ‘इन्सॅट थ्रीडी’ आणि ‘इन्सॅट -थ्रीडीआर’ हे प्रमुख उपग्रह वापरले जातात.
जीआयएस मॅपिंग : जीओग्राफिक इन्फॉर्मेशन सिस्टीम (जीआयएस) तंत्रज्ञानाच्या मदतीने चक्रीवादळप्रवण भागांचे मॅपिंग केले जाते. त्याद्वारे संभाव्य धोके ओळखून नागरिकांचे स्थलांतर करण्यास मदत होते.
रडार सिस्टीम : डॉपलर वेदर रडार (डीडब्ल्यूआर) प्रणालीद्वारे चक्रीवादळांचे निरीक्षण करून वाऱ्याचा वेग आणि दिशा मोजली जाते.
मौसम अ‍ॅप : भारतीय हवामान विभागाने तयार केलेल्या ‘मौसम’ अ‍ॅपद्वारे नागरिकांना हवामानविषयक विविध अंदाज वर्तविले जातात.
दामिनी अ‍ॅप : चक्रीवादळावेळी वीज कोसळण्याचा धोका अधिक असतो. त्यामुळे विजेच्या धोक्याचा अंदाज देण्यासाठी हे ॲप वापरले जाते.
एसएमएस : हवामान विभागाकडून आपत्तीवेळी नागरिकांना एसएमएसद्वारे वेळोवेळी इशारे दिले जातात.