ऐरोलीत उसळला जनसागर
महापालिकेचे स्मारक पाहण्यासाठी गर्दी
वाशी, ता. ६ (बातमीदार) ः डॉ. बाबासाहेब आंबेडकर यांच्या महापरिनिर्वाण दिनानिमित्त हजारो अनुयायी अभिवादन करण्यासाठी ऐरोलीत मोठ्या संख्येने दाखल झाले होते. या वेळी मध्यरात्रीपासून शेकडो अनुयायांनी डॉ. बाबासाहेबांना अभिवादन करण्यासाठी रांगा लावल्या होत्या.
ऐरोली सेक्टर १५ येथील भूखंड क्रमांक २२ (ए) येथे ५७५० चौ.मी. क्षेत्रफळाच्या भूखंडावर नवी मुंबई महापालिकेने साकारलेल्या डॉ. बाबासाहेब आंबेडकर स्मारकाची भव्यता बघून अनुयायी भारावले होते. वर्षभर पालिकेच्या माध्यमातून येथे विविध कार्यक्रम होतात. दादर येथील चैत्यभूमीवर डॉ. बाबासाहेब आंबेडकर यांच्या महापरिनिर्वाण दिनाच्या दिवशी अनुयायांची गर्दी होती; मात्र चैत्यभूमीवर अभिवादन करण्यासाठी जाण्यास ज्यांना जमले नाही त्यांनी ऐरोली येथील स्मारकामध्ये येऊन अभिवादन केले. या वेळी प्रशासनाने चहा-नाष्ट्याची व्यवस्था केली होती. स्मारकातील ई-लायब्ररी, अत्याधुनिक ऑडिओ सुविधेसह जीवनप्रवास दर्शवणाऱ्या छायाचित्रांमुळे अनुयायी भारावले होते. वनमंत्री गणेश नाईक, माजी महापौर सुधाकर सोनवणे यांनीदेखील स्मारकाला भेट दिली.