उल्हासनगर, ता. ६ (वार्ताहर) : उल्हासनगरच्या इतिहासात आजचा दिवस पुन्हा एकदा अभिमानाचा ठरला. महामानव डॉ. बाबासाहेब आंबेडकर यांच्यावरील निष्ठा, आदर आणि विचारांची ज्योत पेटवत तरुणाईचा महासागर ज्वालामय मशालींसह चैत्यभूमीकडे पुढे सरसावला. हातात मशाली आणि हृदयात बाबासाहेबांचे विचार घेऊन पुढे जाणाऱ्या युवाशक्तीचे अविस्मरणीय दृश्य शहरभर दुमदुमून गेले.
महामानव डॉ. बाबासाहेब आंबेडकर यांच्या महापरिनिर्वाण दिनानिमित्त उल्हासनगर शहरात आज भव्य आणि ऐतिहासिक मशाल रॅली काढण्यात आली. कॅम्प ४ सुभाष टेकडी परिसरातील डॉ. बाबासाहेब आंबेडकर यांच्या पुतळ्यास अभिवादन करून रॅलीची सुरुवात झाली. अभिवादनानंतर मशाल प्रज्वलित करत ‘जब तक सूरज-चांद रहेगा, बाबा आपका नाम रहेगा’, ‘जय भीम’ अशा घोषणा देत तरुणांनी परिसर दणाणून सोडला. ही मशाल रॅली सुभाष टेकडी येथून पुढे निघून थेट दादर येथील चैत्यभूमीपर्यंत पोहोचली. मार्गक्रमणादरम्यान सामाजिक संस्थांचे कार्यकर्ते, विविध युवा समूह, विद्यार्थी आणि स्थानिक नागरिकांचा उत्स्फूर्त सहभाग दिसून आला. रॅलीसोबत फलक, घोषणाबाजी आणि डॉ. आंबेडकरांच्या विचारांवर आधारित गीतांमुळे संपूर्ण वातावरण भीममय झाले.

महापरिनिर्वाण दिन हा केवळ स्मृतिदिन नसून प्रत्येक तरुणाला बाबासाहेबांनी दिलेल्या विचारांसाठी कार्य करण्याचा संकल्प जागवणारा दिवस आहे. मशाल ही केवळ प्रकाशाची नसून प्रबोधनाची, संघर्षाची आणि समतेची ज्योत आहे. बाबासाहेबांच्या मार्गावर चालत सामाजिक परिवर्तनासाठी आम्ही सातत्याने कार्य करत राहू.
- निखिल गांगुर्डे, अनुयायी

उल्हासनगर : महापरिनिर्वाण दिनानिमित्त उल्हासनगरातून चैत्यभूमीकडे प्रबोधनाची मशाल रॅली काढण्यात आली.