कासा, ता. ७ (बातमीदार) : डहाणू तालुक्यातील अनेक शेतकऱ्यांची ई-केवायसी प्रक्रिया अद्याप प्रलंबित आहे. याचा परिणाम म्हणून त्यांना पीक नुकसानभरपाई मिळण्यात अडथळे येत आहेत. तालुक्यात अजूनही २,७०० शेतकऱ्यांची केवायसी बाकी आहे. शेतकऱ्यांची नावे प्रलंबित यादीत असल्याने प्रशासनाने ग्रामपंचायतींना आपल्या स्तरावरून त्वरित ई-केवायसी पूर्ण करण्यासाठी शेतकऱ्यांना मार्गदर्शन करण्याचे आवाहन केले आहे.

सध्या प्रत्येक गावात ई-केवायसी शिबिर सुरू करण्यात आले असून संबंधित कागदपत्रांसह शेतकऱ्यांनी ग्रामपंचायत कार्यालयात जाऊन प्रक्रिया पूर्ण करणे आवश्यक आहे. ई-केवायसी पूर्ण झाल्यासच पीक नुकसानीचे अनुदान शेतकऱ्यांच्या खात्यात जमा होणार असल्याने ही प्रक्रिया वेळेत पूर्ण करणे महत्त्वाचे आहे. ग्रामपंचायत, तलाठी व कृषी विभाग यांनी समन्वय साधून शेतकऱ्यांना मदत करावी, असे आवाहन महसूल प्रशासनाकडून करण्यात येत आहे. शेतकऱ्यांनीही विलंब न करता ई-केवायसी करून घेऊन सरकारच्या योजनांचा लाभ घेण्याचे आवाहन करण्यात आले आहे.