बल्याणी परिसरासाठी दीड कोटींच्या विकास कामांना गती
कल्याण, ता. ८ (वार्ताहर) : बल्याणी येथील विकास कामाकरीता शिंदे गटाचे माजी नगरसेवक मयूर पाटील यांच्या पाठपुराव्याने आमदार विश्वनाथ भोईर यांनी दीड कोटी रुपयांचा निधी मंजूर केला. यानुसार बल्याणी, मोहिली, तिपन्नानगर या परिसरातील सीसी रस्ते, गटारे या कामांचे भूमीपूजन माजी नगरसेवक पाटील रविवारी (ता. ७) यांच्या हस्ते करण्यात आले.
मोहिली परिसरात रस्त्यांची दुरावस्था आहे. त्याठिकाणी डीपी रस्ते झाले पाहिजेत. महापालिका प्रकल्पासाठी जागा घेते. परंतु, त्या भागातील विकासाकडे दुर्लक्ष करते. याकडे महापालिका आयुक्त अभिनव गोयल यांनी लक्ष दिले पाहिजे, अशी मागणी पाटील यांनी केली आहे. यासाठी उपमुख्यमंत्री एकनाथ शिंदे आणि खासदार श्रीकांत शिंदे यांच्यासह आमदार विश्वनाथ भोईर यांच्याकडे पाठपुरावा केला आहे. यामुळे येत्या काही दिवसात या डीपी रस्त्यासाठी लवकरच निधी प्राप्त होणे अपेक्षित आहे, असेही मयूर पाटील यांनी सांगितले आहे.
या प्रसंगी वैभव भोईर, माजी नगरसेविका नमिता पाटील, शिवसेना उपशहर प्रमुख अंकूश जोगदंड, विभागप्रमुख राम तरे, शाखाप्रमुख रोहन कोट, राजेश पाटील आदी मान्यवर उपस्थित होते.