सरळगाव ता. ८ (बातमीदार) : कामगार चळवळ आणि वास्तववादी काव्यप्रवाहाला नवी दिशा देणारे प्रसिद्ध कवी नारायण सुर्वे यांच्या जन्मशताब्दी वर्षानिमित्त त्यांच्या साहित्यप्रवासाचे सार घेऊन तयार केलेला एक विशेष साहित्य गौरव ग्रंथ लवकरच प्रकाशित होत आहे. या ग्रंथाचे संपादन गिरीश कंटे यांनी केले आहे. त्यांच्या संघर्षमय आयुष्याचा आणि साहित्यविश्वातील योगदानाचा विस्तृत आढावा या ग्रंथातून वाचकांना मिळणार आहे.
मराठी कवितेत स्वतःची वेगळी वाट निर्माण करणाऱ्या कवी सुर्वे यांच्या कार्याची ओळख नव्या पिढीपर्यंत पोहोचावी, त्यांच्या लेखनाची जाण निर्माण व्हावी, या हेतूने पीपल्स पब्लिकेशन मुंबई आणि स्वातंत्र्यसैनिक गोमाजी रामा पाटील प्रतिष्ठान यांच्या संयुक्त विद्यमाने हा ग्रंथ प्रकाशित होणार आहे. प्रकाशन समितीमध्ये प्रा. हरेंद्र सोस्टे आणि कल्पेश भोईर यांचा समावेश आहे. या गौरव ग्रंथात महाराष्ट्रातील नामवंत साहित्यिकांसोबतच नवोदित लेखकांचेही लेख समाविष्ट असतील. कवी अरुण म्हात्रे, प्रा. अशोक बागवे, डॉ. महेश केळुस्कर, प्रा. प्रवीण दवणे, प्रा. प्रशांत मोरे, कवी तुकाराम धांडे, प्रा. सुरेश अत्रे, प्रा. डॉ. प्रदीप ढवळ, प्रा. भाग्यश्री कुडूक यांच्यासह ठाणे व रायगड जिल्ह्यातील अनेक लेखकांनी आपल्या लेखांचा सहभाग नोंदवला आहे. हा विशेष साहित्य गौरव ग्रंथ येत्या जानेवारी महिन्यात जीवनदीप कॉलेज, गोवेली येथे भव्य कार्यक्रमात प्रकाशित होणार असून साहित्यप्रेमींच्या उत्सुकतेत भर पडली आहे.