बेशिस्त वाहनचालकांना चाप
मुलुंड वाहतूक पोलिसांची कारवाई; १७ लाखांहून अधिक दंड वसूल
मुलुंड, ता. ८ (बातमीदार) : मुलुंड वाहतूक पोलिसांनी बेशिस्त दुचाकीस्वार आणि वाहनचालकांविरुद्ध जोरदार मोहीम उघडून कडक दंडात्मक कारवाई केली आहे. वाहतूक नियमांचे उल्लंघन करणाऱ्या चालकांना चांगलीच चपराक बसली आहे. मुलुंड वाहतूक पोलिसांनी १ ते ३० नोव्हेंबर या एका महिन्याच्या कालावधीत ८,४८१ वाहनचालकांवर कारवाई केली. या कारवाईत त्यांनी १७ लाख ४२ हजार ५५० दंड वसूल केला.
वरिष्ठ पोलिस निरीक्षक महेश तांबे यांनी दिलेल्या माहितीनुसार, मुलुंड वाहतूक पोलिसांनी अनेक प्रकारच्या नियमभंग करणाऱ्यांवर मोटार वाहन नियमांनुसार कारवाई केली आहे. प्रवाशांना इच्छितस्थळी नेण्यास नकार देणाऱ्या रिक्षाचालकांवर विशेष लक्ष ठेवले जात आहे. चुकीच्या ठिकाणी आणि प्रतिबंधित ठिकाणी गाड्या पार्क करणे, पदपथावर दुचाकी अथवा चारचाकी चालवणे किंवा पार्क करणे, चुकीच्या पद्धतीने गाडी ओव्हरटेक केल्यावर कारवाई करण्यात येत आहे. मुलुंड वाहतूक पोलिस विभागाने ही दंडात्मक कारवाई सध्याही सुरू ठेवली असून, यापुढेही वाहतूक नियमभंग करणाऱ्यांवर कारवाई सुरूच राहील, असे स्पष्ट केले आहे.